DaPo MoLotuP

Dapo jighan den molotop!

Pagi tu pagi Senayan. Mak ngan abah den takdo kek ghumah. Gi motong gotah kek kobon gotah. Tingga den, uwan den mo adik den yang umo lapan taun yo kek ghumah.

Tetibo yo dapo ghumah jighan den molotop!!!. Belango ngan koli tohumban kek pintu paga. Uwan den yang tongah ngojoan kekabu tu, dek tergamang eh, biji kekabu diteghajang eh. Lobih sogonggam kekabu dikunyah eh. Den ngan uwan den bekoja nak nolong an jighan den. Umang aii, api nenek moyang bosa eh. Jangan kan nak nolong, dokek pun paneh. Tak ditolongkan jighan, kuk ditolongkan, awak lak moda Den ngan adik den pun bertinggung lah kek pintu paga nunggu an api padam. Jighan den tah apo lah kabaan eh. Kok idup, ado lah. Tak lamo tu, jighan den pun balik. Ghupo eh dio gi bonda tengok anak eh tangkap ikan. Pueh den kobaan dapo eh tebaka, tak diapik eh. Suko bona anak eh dapek ikan bosa. Polak nyawa den.

Yo tak yo, den pun balik ghumah. Kojap tu, den dongar jighan den meghaung. Baghu perasan lah tu. Agak eh, dio nak masak ikan, gi dapo tengok dah hanguih. Kang kok dio datang ngadu kek ghumah den, mau yo den ghembat eh. Pueh den kobaan tadi .

Tu lah cito sederhana ngoghi yang den tengok. Tapi tu pun dah lamooo. Maso den kocik. Tu pun uwan den yang cito.

“KOK MONGAK WAN DEN, MONGAK LAH DEN”

Note: Den rembat dari blog bini den